«Болашаққа бағдар: рухани жаңғыру» бағдарламасы аясында , 17 ақпан күні Экономика және қаржы кафедрасының эдвайзері Н.К.Душова ,2 курс Туризм мамандығының студенттерімен Ұлы ұстаз –Ахмет Байтұрсынұлының 150 жылдығына арналған ашық эдвайзерлік сағатты ғалымның мұражай-үйінде өткізді.
Ерекше форматта өткен ашық эдвайзерлік сағат барысында, ғалымның өмірбаяны мен шығармашылығы жайында сөз қозғалып, тарихи тұлғаның көзі тірісінде қолы тиіп, кәдесіне жаратқан бұйымдарына шолу жасалды.
Осы орайда ата-бабаларымыздың өмірін әйгілейтін мұраларды жоғалтпай сақтап, адамзат тәрбиесіне пайдалануда, келешек ұрпаққа мұра етіп қалдырған мұражай қызметкерлері де , Ахмет Байтұрсынұлының басынан кешкен қиын-қыстау күндері, ауыр жолдары, қуғын-сүргін, жетімдік-жоқтық, ел тағдыры, халық қамы, бостандық арманы жайында жазылған шығармалары туралы баяндама жасады. Атап айтсақ,ақынның “Жиған-терген” өлеңіндегі: Қазағым, елім, Қайқайып белің, Сынуға тұр таянып. Талауда малың, Қамауда жаның, Аш көзіңді оянып – деген сөздерді студенттер арасында патриоттық сананы қалыптастырып, отансүйгіштікке тәрбиелеу мақсатында ерекше әсер қалдырды. Сонымен қатар мұражай қызметкері Ж.Ғ.Құрманәлі, ғалымның мұражай-үйінің жалпы құрылымы жайында мағұлмат берді. «А.Байтұрсынұлы көшесіндегі 60-үйде, яғни, ғалымның Мұражай-үйі төрт бөлме және бір жертөледен тұрады. Оның бір бөлмесі – ахметтану дәрісханасы. Үш залда ғалымның шығармашылық ғұмырына қатысты экспонаттар жасақталған. Бірінші зал: «Ұлттық рухымыздың қайта оралуы», Екінші зал: «Қазақ санасының шамшырағы», ал Үшінші зал: «Саясат құрбаны» деп аталып, онда ғалымның істі болған, түрмедегі кезеңдері қамтылған. Музей жанынан 1000-ға жуық кітап, 500-дей әдеби журналдар, 50-дей түрлі конференция материалдары және апталық газет тігінділері қамтылған кітапхана жұмыс істейді. Музей-үйде ғалымның туған күні 5 қыркүйекте «Тұлға тағылымына – тағзым» атты ахметтану оқулары жыл сайын өткізілетін дәстүрлі шараға айналды» - деді. Жиын соңында қатысушылар алған әсерлерімен бөлісіп, алдағы уақытта А.Байтұрсынұлы мұражай-үйінің тұрақты келушілері қатарынан болатынын айтты.