Халықаралық инженерлік-технологиялық университетінің оқытушылары мен студенттері 13 қазанда Қазақстан Республикасы Мемлекеттік орталық музейінде ұйымдастырылған ақын, драматург Исраил Сапарбайдың «Жыр айдынының алып кемесі» атты әдеби-танымдық кешін тамашалап қайтты.
Әдеби-танымдық кеште ақынның «Имани гүлдің төркіні», «Әлем, әйел және мен», «Әмір Темір» кітаптарының тұсауы кесіліп, музей қорына тапсырған жеке мұрағаттары көпшілік назарына ұсынылды.
«Жыр айдынының алып кемесі» атанған ақын Исраил Сапарбай бұған дейін Халықаралық инженерлік-технологиялық университетінің ұжымымен, оқытушы, студенттер қауымымен қауышып, университетте әдеби кездесу орын алған еді. Сол тамаша кеште Халықаралық инженерлік-технологиялық университетінің ректоры Гүлнар Сәрсенбекова ақынға алғыс хат арнап, жылы лебізін жеткізген. Дәл сол алғыс хат Орталық музейде өткен әдеби-танымдық кеште төрден орын алып, көзімізге оттай басылды. Бұл - ақын мен білім ордасы арасындағы ерекше сыйластықты аңғартты. 
Аталған іс-шараға  ҚР Жазушылар одағының өкілдері, мемлекет қайраткерлері, ақын-жазушылар және өнер саласының мамандары қатысты. 
Студенттер әдеби кештен танымдық ақпараттар алып, ақын шығармашылығымен тереңнен танысты.