"Инженериядегі Смарт технологиялар" кафедрасының оқытушылары жасанды интеллект саласында біліктілігін арттыру бойынша ауқымды бағдарламаға қатысу үшін грантқа ие болды. Бағдарлама ҚР Цифрлық даму, инновациялар және аэроғарыш өнеркәсібі министрлігі, ҚР Ғылым және жоғары білім министрлігі және Astana Hub технопаркімен бірлесіп Tech Orda бастамасы аясында ұйымдастырылды.

Оқыту «Тренерлерді тренингтен өткізу» (ToT) форматында өтеді, бұл қатысушыларға заманауи технологияларды меңгеріп қана қоймай, оларды оқыту тәжірибесінде қолдануға мүмкіндік береді. Бағдарлама оқытушылардың білімдерін студенттерге тиімді жеткізу қабілеттерін дамытуға бағытталған, жасанды интеллект индустриясындағы заманауи тәсілдерге ерекше назар аударылады.