02.12.2024 Алматы Жастар Саясаты Басқармасының ұйымдастыруымен өткен «IQ Battle» интеллектуалдық ойынының қорытындысы бойынша METU университетінің 1-курс студенттері жүлделі орынға ие болды.

Бұл жыл сайын өтетін интеллектуалдық ойында Алматы қаласының 7 университетінің үздік студенттері қатысып, өздерінің білімдері мен тапқырлықтарын сынады. Ойын бірнеше кезеңнен тұрып, қатысушылар түрлі сұрақтарға жауап беру арқылы өздерінің логикалық ойлау қабілеттерін көрсетуге мүмкіндік алды.

METU университетінің бірінші курс студенттері Төлеген Анель, Ержан Нағима және Абайқызы Сымбат ерекше өнер көрсетіп, жеңімпаздар қатарынан орын алды. Олар жарыстың барлық кезеңдерінде жоғары көрсеткіштермен ерекшеленіп, білім мен еңбектің нәтижесінде 3-орынға ие болды. Бұл жетістік олардың тек білімділігін ғана емес, сондай-ақ команда болып жұмыс істеу қабілеттерін де дәлелдеді.

Жарыстың ұйымдастырылу мақсаты — жастарды интеллектуалдық сайыстарға тарту, шығармашылықты дамыту және білімге деген құштарлықты арттыру. METU студенттерінің бұл жеңісі білім мен еңбек арқылы қол жеткізілген үлкен жетістік болып табылады. Бұл оқиға оқу орнының мәртебесін арттырып, жастардың өздерінің білімдерін шыңдауға ынталандырады.