Халықаралық инженерлік-технологиялық университеті (МИТУ) еліміздің ірі өндірістік кәсіпорындарымен әріптестік қатынастарды нығайту мақсатында «СарыаркаАвтоПром» ЖШС және «АгромашХолдинг KZ» АҚ компанияларымен ынтымақтастық туралы меморандумдарға қол қойды.

Меморандумдар білім беру, ғылыми-техникалық және инновациялық салаларда өзара әрекеттестікті дамытуға бағытталған. Негізгі басымдық – өндірістің нақты қажеттіліктеріне бейімделген кадрларды даярлау, қолданбалы және пәнаралық зерттеулер жүргізу, сондай-ақ технологияларды трансферлеу және ғылыми нәтижелерді коммерцияландыру.

«СарыаркаАвтоПром» компаниясымен ынтымақтастық ғылыми жобаларды іске асыруды, бірлескен іс-шараларды өткізуді, студенттер мен оқытушылардың тәжірибеден өтуін ұйымдастыруды, сондай-ақ ақпараттық-коммуникациялық технологиялар, телекоммуникациялар және машина жасау бағыттарында мамандар даярлау бағдарламаларын дамытуды көздейді.

Ал «АгромашХолдинг KZ» компаниясымен серіктестік аясында өндірістік және зерттеу практикаларын өткізу, стартаптар мен жастар бастамаларын қолдау, сондай-ақ агротехнологиялық бағытта бірлескен оқу-өндірістік учаскелер мен зертханаларды құру жоспарланған.

Қол қойылған меморандумдар тараптардың өзара тиімді ынтымақтастықты дамытуға деген ортақ ұмтылысын бекітеді және нақты бағыттар бойынша келісімдер жасау үшін негіз болып табылады.