21 тамыз күні Халықаралық инженерлік-технологиялық университетінде Қытай Халық Республикасының Цзянсу технологиялық университеті делегациясымен ресми кездесу өтті.

Делегация құрамында Юй Цинмэй – Халықаралық ынтымақтастық және алмасу басқармасының директоры, Халықаралық білім беру институты директорының орынбасары; Чжэн Цюцзюань – Мәдениет және туризм институты директорының орынбасары және Чжан Ян – Халықаралық білім беру институты директорының орынбасары болды.

Кездесу барысында тараптар бірқатар маңызды мәселелерді талқылады. Атап айтқанда:

• студенттерге жаңа мүмкіндіктер ашатын қос дипломдық білім беру бағдарламаларын енгізу;

• студенттер мен оқытушылардың тәжірибе алмасуына және ғылыми байланыстарды нығайтуға бағытталған академиялық ұтқырлықты дамыту;

• бірлескен зерттеулер мен практикалық дайындыққа арналған алаңға айналатын МИТУ базасында Цзянсу политехникалық институтының зертханаларын ашу.

Келіссөздер өзара сенім мен қызығушылық атмосферасында өтті. Жасалған уағдаластықтар халықаралық ынтымақтастықты нығайтуға, мамандарды даярлау сапасын арттыруға және инновациялық ғылыми жобаларды дамытуға негіз қалады.

Екі университет басшылығы ортақ бастамаларды жүзеге асыруға дайын екенін білдіріп, бұл ынтымақтастық инженерия және технология саласында бәсекеге қабілетті кадрларды даярлауда маңызды қадам болатынын атап өтті.