2025 жылғы 17 қыркүйек күні Халықаралық инженерлік-технологиялық университет (ХИТУ) Ақпараттық технологиялар және бағдарламалық инженерия кафедрасында Huawei компаниясының өкілдерімен маңызды кездесу өтті. Кездесудің басты мақсаты — студенттерге Huawei ICT Competition Roadshow 2025–2026 халықаралық бағдарламасына қатысу мүмкіндіктерін таныстыру және дайындық қадамдарын түсіндіру болды.

Іс-шара барысында кафедра оқытушылары мен студенттеріне Roadshow бағдарламасының құрылымы мен кезеңдері туралы толық ақпарат берілді. Кездесуді Темірлан Жақсылықов жүргізіп, қатысушыларды конкурс ережелерімен және талаптарымен таныстырды.

Талқыланған негізгі бағыттар:

·         Huawei ICT Competition туралы жалпы мәлімет және байқау кезеңдері

·         Қатысу шарттары, студенттерді тіркеу, технологиялық бағыттарды таңдау

·         Дайындыққа арналған ұсыныстар мен ресурстар

·         Жеңімпаздарға арналған халықаралық мүмкіндіктер мен сертификаттар

Кездесу соңында студенттер өз сұрақтарын қойып, Huawei мамандарынан нақты жауаптар алды. Бұл кездесу кафедра мен студенттерге байқауға жүйелі түрде дайындалуға жол ашты.