17 қазанда Халықаралық инженерлік-технологиялық университеттің ректоры Д.Б. Ақпанбетов ғылыми бағдарлама BR21881957 «Бие және түйе сүтін терең өңдеудің технологиясы мен вакуум-сублимациялық кептіру жабдығын әзірлеу» аясында жасалған FD-4.1 вакуум-сублимациялық кептіру кешенінің тәжірибелік үлгісінің таныстырылымына қатысты.

Бағдарлама Халықаралық инженерлік-технологиялық университеті (МИТУ), академик Ө.А. Жолдасбеков атындағы Механика және машинатану институты және «Qymyz» қазақ-неміс ғылыми-зерттеу институты» ЖШС ғалымдарының бірлескен еңбегімен жүзеге асырылды. Нәтижесінде МИТУ базасында Тағам инженериясының вакуум-сублимациялық технологияларының ғылыми-оқу орталығын құру жоспарланып отыр. Бұл орталықта студенттер мен ғылыми қызметкерлер әзірленген жабдықты оқу және зерттеу мақсатында пайдалана алады.

Жобаны жүзеге асыруда «Qymyz» қазақ-неміс ғылыми-зерттеу институты» ЖШС маңызды рөл атқарады. Институт технологияны өнеркәсіптік деңгейде енгізу мен техникалық сүйемелдеуді қамтамасыз етіп, жабдықты өндірістік алаңдарда сынақтан өткізуге ықпал етеді. Құрылып жатқан орталықтың бірегейлігі – «Qymyz» институтының өндірістік қолдау көрсетіп, технологияларды енгізу процесін сүйемелдеуі. Бұл өз кезегінде тапсырыс берушілердің нақты сұраныстарына жедел жауап беруге және ғылыми әзірлемелердің экономикалық тиімділігін арттыруға мүмкіндік береді.

Іс-шараны Қазақстан Республикасының Ұлттық инженерлік академиясының вице-президенті, академик А.К. Төлешов ашып, атқарылған жұмыстың жоғары ғылыми-техникалық деңгейін және оның отандық инженерлік ғылымның дамуына қосқан зор үлесін атап өтті:

«Бұл жұмыс жоғары ғылыми және техникалық деңгейде орындалған, ғылыми және әлеуметтік маңызы зор. Ғалымдар жаңа технологиялық шешімдер ұсынды - бұл әртүрлі салалар мамандарының нақты экономикалық нәтиже үшін бірлескен еңбегінің жарқын мысалы», - деді ол.

Академик жобаның ғылым, білім және өндіріс арасындағы тиімді өзара байланыс пен синергияның үлгісі екенін, сондай-ақ инженерлік және агротамақтық бағыттарда осындай бастамаларды іске асыруға жол ашатынын ерекше атап өтті.

Іс-шараға академик Ө.А.Жолдасбеков атындағы Механика және машинатану институтының өкілдері, Қазақстандағы тамақ өнеркәсібіне арналған жабдық өндіретін ірі компаниялардың бірі – «PROSNAB service» ЖШС, сондай-ақ «Агроинженерия ғылыми-өндірістік орталығы» ЖШС өкілдері қатысты. Олар технологияны тәжірибелік тұрғыда сынау және тәжірибе алмасу ісіне өз үлестерін қосты.