Халықаралық инженерлік-технологиялық университеті (METU) 25–26 қараша күндері Ташкент қаласында Орталық Азия университетінің (CAU) базасында өтіп жатқан алғашқы QS Eurasia 2025 форумына қатысуда. Іс-шара QS Quacquarelli Symonds ұйымымен бірлесіп, Өзбекстан Республикасының Жоғары білім, ғылым және инновациялар министрлігінің қолдауымен ұйымдастырылды.

Форум университеттер, мемлекеттік органдар және халықаралық ұйымдардың көшбасшыларын біріктіріп, жоғары білімнің жаһандық дамуы бойынша маңызды еуразиялық алаңға айналды. Биылғы негізгі тақырып — «Көкжиектерді кеңейту: жоғары білімде жаһандық көпірлер құру» — халықаралық серіктестікті нығайтуға, ғылыми ынтымақтастықты дамытуға және өңір университеттерінің жаһандық танымалдығын арттыруға бағытталған.

Форумға білім саласының жетекші өкілдері қатысты, олардың қатарында — QS президенті Нунцио Куаккарелли, Қазақстан Республикасының Ғылым және жоғары білім министрі Саясат Нұрбек, Өзбекстан Республикасының Жоғары білім министрі проф. д-р Қонғратбай Шарипов, БАӘ Университетінің канцлері Зәки Анвар Нуссейбах, Орталық Азия университетінің президенті Камран Гуламов және QS аймақтық директоры Сергей Христолюбов болды.

Форум барысында Қазақстан Республикасының Ғылым және жоғары білім министрі Саясат Нұрбектің сөзі ерекше назарға ие болды. Ол халықаралық ғылыми коллаборацияларды кеңейтудің, бірлескен бастамаларды дамытудың және Еуразия университеттерінің жаһандық білім кеңістігіндегі рөлін арттырудың маңыздылығын атап өтті.

METU үшін QS Eurasia 2025 форумына қатысу — университеттің халықаралық беделін арттыруға, ғылыми жобаларды дамытуға, жаңа білім беру бағдарламаларын қалыптастыруға және жаһандық академиялық қауымдастыққа терең интеграциялануға жасалған маңызды қадам.

Форум қорытындысында Еуразияның жаһандық білім беру диалогындағы рөлін күшейтуге және аймақ университеттері арасындағы ынтымақтастықты кеңейтуге бағытталған стратегиялық ұсынымдар әзірленеді.