Халықаралық инженерлік-технологиялық университеті METU-де Қазақстан Республикасы Қаржылық мониторинг агенттігінің өкілдері студенттерге арналған дәріс өткізді. Іс-шара жастардың құқықтық сауаттылығын арттыруға және заң талаптарын сақтау мәдениетін дамытуға бағытталды.

Дәріс барысында Агенттік мамандары қаржылық қауіпсіздік мәселелерін, ақша жылыстатуға қарсы іс-қимыл тетіктерін, қаржылық алаяқтықтың түрлерін және экономикалық саладағы өзге де құқықбұзушылықтарды түсіндірді. Сондай-ақ цифрлық қауіпсіздік, дербес деректерді қорғау және қаржылық операцияларды жүзеге асыру кезіндегі азаматтардың құқықтық жауапкершілігі туралы маңызды ақпарат берілді.

Студенттер тақырыпқа ерекше қызығушылық танытып, өздерін толғандырған сұрақтарын қойып, талқылауға белсенді қатысты. Агенттік өкілдері жастардың құқықтық мәдениетін арттырудың маңыздылығын атап өтті, себебі қазіргі цифрлық және қаржылық ортада жастар жиі түрлі қауіп-қатерлерге тап болады.

Дәріс соңында университетке құқықтық және қаржылық сауаттылық тақырыбында әзірленген ақпараттық материалдар табысталды. Бұл материалдар студенттердің кеңінен танысуы үшін METU-дің ішкі ақпараттық алаңдарында орналастырылатын болады.

METU алдағы уақытта да студенттердің құқықтық мәдениетін нығайтуға және заңдылықты сақтауды насихаттауға бағытталған бастамаларды қолдауды жалғастырады.