Халықаралық инженерлік-технологиялық университетінде «Алла Ильчун – Dior подиумындағы қазақ қызы және көптілді сөйлеу мәдениетінің жаһандық күші» атты халықаралық деңгейдегі маңызды іс-шара өтті. Шара әлемдік сән тарихында өшпес із қалдырған бірегей тұлғаның өмірі мен мұрасына арналды.
Алла Ильчун қазақ тамырлы, әрі жоғары сән тарихындағы алғашқы азиялық манекендердің бірі саналады. Ол Кристиан Диордың нағыз музасына айналып, француз мәдени мұрасының ажырамас бөлігіне енген, Шығыс пен Батыстың нәзік үйлесімін танытқан ерекше бейнені қалыптастырды.
Іс-шараның презентациялық бөлігінің маңызды бөлігі — Алла Ильчун есімінің қайтадан ғылыми және мәдени ортаға оралу тарихы. Студенттер Парижде он жылдан астам өмір сүріп келе жатқан белгілі тележүргізуші, зерттеуші, деректі фильм авторы және публицист Берлин Иришевтің еңбектерін таныстырды.
Берлин Иришев шараға келе алмағанымен, оның зерттеулері, кітаптары мен деректі фильмдері іс-шара бағдарламасының негізгі ғылыми-әдістемелік негізіне айналды. Ол Алла Ильчун туралы деректер табуды өзінің «нағыз мәдени жаңалығы» ретінде атап, жылдар бойы мұрағаттармен жұмыс жасап, туыстары мен замандастарының естеліктерін жинап, оның өмірбаянын қалпына келтіруге көп күш жұмсаған.
Өз еңбектерінде Берлин Иришев Алла Ильчунды: «сол кезеңде Еуропа біле бермейтін шығыс поэтикасын, қазақ сұлулығының ерекше сызығын Dior подиумына алып келген әйел», — деп сипаттайды.
Оның айтуынша, Алланың есімі «ұмыт қалған символ» болған, бірақ ол Қазақстанға да, әлемге де ұлттық тарих пен мәдени мұра ретінде қайтарылуы тиіс еді. Зерттеу барысында бұрын белгісіз фотосуреттер, құжаттар мен куәгерлердің естеліктері табылып, модельдің қазақ текті екені алғаш рет айқын дәлелденді. Бұл еңбек жас зерттеушілер мен дизайнерлерге шабыт берген маңызды мәдени жаңалық болды.
Алла Ильчун тағдыры Франциямен тығыз байланысты болғандықтан, іс-шараға француз білім беру, дипломатия және мәдени ұйымдарының өкілдері қатысты:
— Мсье Франсуа Монежер, Алматыдағы Alliance Française атқарушы директоры, Францияның Еуропа және сыртқы істер министрлігінің өкілі;
— Мадам Аньес Буссе, Сорбонна–Қазақстан институтының француз тарапының директоры, Франция елшілігінің халықаралық байланыстар жөніндегі атташесі;
— Айтжанова Гүлнара Досқожаевна, әл-Фараби атындағы ҚазҰУ доценті, франкофон педагог;
— Сейдикенова Алмаш Смайыловна, Пуатье университетінің профессоры (Франция), онлайн қатысты.
Қонақтар Алла Ильчунның француз сән тарихындағы ерекше рөлі мен Қазақстан мен Франция арасындағы мәдени көпір ретіндегі маңызын атап өтті.
Мсье Монежердің айтуынша, Алла Ильчун —
«Еуропаның сұлулық туралы түсінігін өзгерткен шығыс әйелдерінің бірі».
Ол Алланың Dior подиумының көркемдік тілін өзгерткенін, шығыс нәзіктігі мен жаңа эстетиканы алып келгенін айтты.
Мадам Буссе Алла Ильчунның тұлғасы «француз сәнінің тарихында бөлек тарауға лайық» екенін атап өтті.
Қонақтар Алланың бейнесі тек сән әлемі үшін емес, Қазақстанның жаһандық мәдени процестердегі орнын түсіну үшін де маңызды екенін айтты.
Іс-шара қазақ, орыс, ағылшын, француз, араб тілдерінде өтті, сондай-ақ қытай және корей тілдері де қолданылды. МИТУ студенттері бірнеше тілде еркін сөйлеп, жоғары деңгейдегі көпмәдениетті құзыреттілікті танытты.
Мсье Монежер студенттердің түрлі тілге еркін ауыса алу қабілетін олардың кең дүниетанымының көрсеткіші деп атап өтті.
Мадам Буссе МИТУ-дағы көптілділікті «Франция мен Қазақстан арасындағы тірі көпір» деп атады.
Франция тарапынан келген өкілдер Франция елшілігі талантты және көптілді МИТУ студенттерін қолдауға дайын екенін, оларды халықаралық бағдарламаларға, академиялық алмасуларға және мәдени жобаларға тартуға мүдделі екенін мәлімдеді.
Іс-шара Алла Ильчунға құрмет қана емес, халықаралық ынтымақтастықты нығайтуға бағытталған маңызды қадам болды.
МИТУ көпмәдениетті, ашық және көптілді академиялық ортаны дамытудағы өзінің рөлін тағы бір мәрте дәлелдеді.
Алла Ильчун — бір тағдыр құрлықтарды тоғыстыра алатынын дәлелдейтін символ.
Ал МИТУ — осындай тарихтар қайта жаңғыратын мекен.
