Мемлекет басшысы Қасым-Жомарт Тоқаев «Turkistan» газетіне берген көлемді сұхбатында елдің қазіргі даму бағыты, әлеуметтік-экономикалық реформалардың нәтижесі, ақпараттық кеңістіктің сапасы және қоғам алдындағы негізгі міндеттер жөнінде жан-жақты пікір білдірді. Президенттің айтуынша, Қазақстан бүгінде жаңғырудың жаңа кезеңіне аяқ басты және бұл кезең нақты реформалармен, экономикалық өсіммен және қоғамдық санадағы өзгерістермен сипатталады.

Сұхбаттың басында Мемлекет басшысы «Turkistan» газетінің елдегі қоғамдық пікір қалыптастырудағы рөліне тоқталды. Президент бұл басылымның отыз жылдан астам уақыт бойы үздіксіз шығып келе жатқанын атап өтіп, оның ұлттық сана, түркі дүниесі және қоғамдық ойды дамытудағы маңызын жоғары бағалады. Қасым-Жомарт Тоқаев шетелде еңбек етіп жүрген, түрлі салада табысқа жеткен отандастар туралы мақалаларды ерекше қызығушылықпен оқитынын айтып, мұндай материалдар ел мен сырттағы қазақ диаспорасы арасындағы рухани байланысты нығайта түсетінін жеткізді.

Президент сұхбат барысында қазіргі ақпараттық кеңістіктің ахуалына да арнайы тоқталды. Оның айтуынша, әлеуметтік желілер ақпарат таратуда жетекші орынға шыққанымен, ондағы контенттің сапасы әрдайым жоғары бола бермейді. Кей жағдайда үстірт, қысқа әрі эмоцияға құрылған ақпарат адамның терең ойлау қабілетіне кері әсер етуі мүмкін. Осы тұрғыда Мемлекет басшысы дәстүрлі баспасөздің, әсіресе сараптамалық мақалалар мен аналитикалық материалдардың рөлі артып келе жатқанын атап өтті. Президенттің пікірінше, газет оқу – адамның ой-өрісін кеңейтіп, ақпаратты талдап қабылдау мәдениетін қалыптастырады. Қасым-Жомарт Тоқаев өзі де мерзімді баспасөзді ұзақ жылдар бойы тұрақты оқып келе жатқанын айтып, журналистердің кәсіби жауапкершілігіне ерекше мән берді. Мемлекет басшысы қоғамға ұсынылатын ақпарат нақты, дәлелді және салмақты болуы тиіс екенін, ал журналистика ағартушылық миссиясын жоғалтпауы керектігін атап көрсетті.

Сұхбаттың маңызды бөлігі елдің әлеуметтік-экономикалық дамуына арналды. Президенттің айтуынша, 2025 жылы Қазақстан экономикасы 6 пайыздан астам өсім көрсетті, жалпы ішкі өнім 300 миллиард доллардан асты, ал жан басына шаққандағы табыс 15 мың доллардан жоғары деңгейге жетті. Бұл көрсеткіштер Қазақстанның өңірдегі жетекші экономикалардың бірі екенін дәлелдейді. Дегенмен Мемлекет басшысы экономикалық жетістіктермен қатар, қоғамды алаңдататын мәселелер де бар екенін жасырмады. Соның ішінде инфляция деңгейі азаматтардың күнделікті өміріне айтарлықтай әсер етіп отырғанын атап өтті. Президент реформалар мәселесіне айрықша тоқталды. Оның айтуынша, Қазақстан соңғы жылдары жүйелі реформалар жолына түсті және бұл бағыттан кері қайту болмайды. Мемлекет басшысы жүргізіліп жатқан реформалардың басты мақсаты – экономиканы әртараптандыру, әділетті қоғам қалыптастыру және мемлекеттік басқарудың тиімділігін арттыру екенін айтты. Қасым-Жомарт Тоқаев реформалар бір күнде нәтиже бермейтінін, алайда олардың ұзақ мерзімді әсері ел дамуына серпін беретінін атап өтті.

Сұхбат барысында салық жүйесін жаңарту мәселесі де қозғалды. Президент жаңа Салық кодексін әзірлеу экономикалық тұрақтылықты қамтамасыз етуге және әлеуметтік әділеттілікті күшейтуге бағытталғанын айтты. Оның пікірінше, салық саясаты түсінікті әрі ашық болуы тиіс, ал азаматтардың салық мәдениетін арттыру – мемлекеттің де, қоғамның да ортақ міндеті. Мемлекет басшысы бұл саладағы реформалар экономиканың ұзақ мерзімді дамуына негіз болатынын атап өтті.

Ақпараттық мәдениет тақырыбын жалғастыра отырып, Қасым-Жомарт Тоқаев қоғам мүшелерін сапалы ақпаратты таңдай білуге шақырды. Президенттің айтуынша, ақпарат ағынының көптігі адамның ойлау қабілетіне әсер етеді, сондықтан әр азамат мазмұны терең, мағыналы дереккөздерге сүйенуі тиіс. Бұл ретте мерзімді баспасөз бен кәсіби журналистиканың орны ерекше.

Сұхбат соңында Мемлекет басшысы Қазақстанның даму бағыты айқын екенін және елдің жаңғыру жолында нақты қадамдар жасап жатқанын атап өтті. Экономикалық өсім, институционалдық реформалар, ақпарат мәдениетін көтеру және қоғамның жауапкершілігін арттыру – осының барлығы елдің жаңа кезеңге қадам басқанын көрсетеді. Қасым-Жомарт Тоқаевтың айтуынша, алдағы жылдары бұл бағыттағы жұмыстар жалғасын тауып, реформалар нақты нәтижелерін бере бастайды.