Халықаралық инженерлік-технологиялық университетінде (METU) «Қаржы» және «Есеп және аудит» білім беру бағдарламаларының студенттеріне арналған қаржылық сауаттылық бойынша мастер-класс өтті. Іс-шара Қазақстан Республикасы Ұлттық Банкінің Бас филиалы агенттігінің (ҚР ҰБ БФА) өкілдерінің қатысуымен ұйымдастырылды.

Мастер-кластың ұйымдастырушысы — Бердимуратова Куралай Кадиркуловна, эғм, «Экономика және бизнес» кафедрасының лекторы.

Іс-шара барысында ақша-несие жүйесінің жұмыс істеуі және мемлекеттің қаржылық тұрақтылығын қамтамасыз ету мәселелері қарастырылды.

«Ақша-несие саясаты» тақырыбында ҚР ҰБ БФА экономикалық талдау және статистика бөлімінің басшысы Мухамедьянов Олжас Дамирович баяндама жасады. Спикер өз сөзінде ақша-несие саясатының мақсаттары мен құралдарын, Ұлттық Банктің баға тұрақтылығын қамтамасыз етудегі рөлін, сондай-ақ макроэкономикалық шешімдердің қаржы нарығы мен ел экономикасына әсерін жан-жақты түсіндірді.

Студенттер арасында Қазақстан Республикасының ұлттық валютасы — теңге тақырыбы ерекше қызығушылық тудырды. Мастер-класс барысында теңгенің даму хронологиясы ұсынылып, қолданыстағы банкноттар, «Сақ стилі» жаңа банкноттар сериясы, сондай-ақ коллекциялық монеталар және олардың қаржылық мәдениетті қалыптастыру мен инвестициялық нарықты дамытудағы маңызы қарастырылды.

Жеке бөлім заманауи инвестициялық құралдарға арналды. ҚР ҰБ БФА қолма-қол ақшамен жұмыс және кассалық операциялар бөлімінің басшысы Токмагамбетов Асқар Төребекұлы Gold Coin инвестициялық өнімін таныстырып, оның ерекшеліктері, артықшылықтары және капиталды сақтау мен көбейту құралы ретіндегі мүмкіндіктерін түсіндірді.

Мастер-класс барысында студенттер жоғары белсенділік танытып, қаржылық сауаттылықты арттыру, қаржылық алаяқтықтың алдын алу, қаржылық қызметтер тұтынушыларының құқықтарын қорғау, сондай-ақ қаржы жүйесінің жұмыс істеуінің практикалық аспектілері бойынша мазмұнды сұрақтар қойды. Ұлттық Банк мамандарымен болған ашық диалог студенттердің кәсіби білімін тереңдетіп, тәжірибелік дағдыларын қалыптастыруға мүмкіндік берді.

Өткізілген іс-шара студенттердің қаржылық мәдениетін қалыптастыруға және қаржы, есеп және аудит салалары бойынша болашақ мамандарды даярлау сапасын арттыруға маңызды үлес қосты.