4 ақпанда Халықаралық инженерлік-технологиялық университетінде көрнекті ақын, қоғам қайраткері әрі ойшыл Олжас Сүлейменовтің 90 жылдығына арналған «Олжас Сүлейменовтің әлем рифмалары» атты III әдеби фестиваль өтті.

Іс-шараны ЮНЕСКО қамқорлығындағы Мәдениеттерді жақындастыру халықаралық орталығы, Халықаралық инженерлік-технологиялық университеті және Алматы қаласы Білім басқармасының Жаңа технологиялар жөніндегі қалалық ғылыми-әдістемелік орталығы ұйымдастырды. Фестивальдің серіктесі — Еуразиялық мәдениет қоры.

Фестивальдің құрметті қонақтарының қатарында ғылыми, мәдени және қоғамдық қауымдастық өкілдері болды. Атап айтқанда, ЮНЕСКО қамқорлығындағы Мәдениеттерді жақындастыру халықаралық орталығының ғылым және сыртқы байланыстар жөніндегі директордың орынбасары Игорь Владимирович Крупко, «Невада–Семей» халықаралық антиядролық қозғалысының вице-президенті Валерий Айтмұқашевич Жандаулетов, Қазақстан Республикасы Сыртқы істер министрлігі Өкілдігінің саяси ынтымақтастық басқармасының басшысы Алмаша Арыстановна Аренова, сондай-ақ Қазақстан Республикасындағы Франция Республикасының Бас консулы Максим Жеренже қатысты. Құрметті қонақтардың қатысуы фестивальдің жоғары халықаралық мәртебесін және оның мәдениетаралық диалог пен гуманитарлық ынтымақтастықты дамытудағы маңызын айқындады. 

Қатысушыларға Халықаралық инженерлік-технологиялық университетінің ректоры Дархан Берікұлы Ақпанбетов, ЮНЕСКО қамқорлығындағы Мәдениеттерді жақындастыру халықаралық орталығы директорының орынбасары Игорь Владимирович Крупко, «Невада–Семей» халықаралық антиядролық қозғалысының вице-президенті Валерий Айтмұқашевич Жандаулетов және ҚР СІМ Өкілдігінің саяси ынтымақтастық басқармасының басшысы Алмаша Арыстановна Аренова құттықтау сөз сөйледі.

Фестиваль бағдарламасында ақынның өлеңдеріне арналған музыкалық бейнеклип, архивтік хроника, жастар арасында жүргізілген бейнесауалнама, сондай-ақ мектеп оқушыларының орындауындағы Олжас Сүлейменовтің өлеңдерін көркем оқу ұсынылды. Оқушылардың жасанды интеллект технологияларын пайдалана отырып жасаған суреттері мен бейнежобалары ерекше қызығушылық тудырып, классикалық әдебиет пен заманауи цифрлық құралдардың өзара байланысын көрсетті.

Іс-шара көрермендермен интерактивті сұхбатпен, сұрақ-жауап форматымен, сертификаттар мен кітаптарды тапсыру рәсімімен және қатысушылардың ортақ фотосуретімен аяқталды. Фестиваль университет пен қаланың мәдени өміріндегі маңызды оқиғаға айналып, әдеби мұраны сақтаудың маңыздылығы мен оның жас ұрпақ үшін өзектілігін айқындады.