2026 жылдың 5 ақпанында университет қабырғасында студенттер мен оқытушылар құрамына арналған «Құқықтық сауаттылық және сыбайлас жемқорлық тәуекелдерінің алдын алу» тақырыбында ашық форматтағы дәріс-кездесу өтті. Іс-шараның негізгі мақсаты – білім алушылардың құқықтық мәдениетін арттыру, азаматтық жауапкершілікті қалыптастыру және сыбайлас жемқорлыққа қарсы саясаттың негізгі бағыттарын түсіндіру. Аталған кездесуге Қазақстан Республикасы Ұлттық қауіпсіздік комитеті Академиясының оқытушылары – Тазабеков Азамат Дидарович пен Жаулыбеков Асет Айдосович арнайы шақырылып, ақпараттық-түсіндіру сипатындағы мазмұнды дәріс жүргізді.

Дәріс барысында спикерлер Қазақстан Республикасының қолданыстағы заңнамасы аясында сыбайлас жемқорлыққа қарсы іс-қимылдың құқықтық негіздеріне тоқталып, оның ішінде «Сыбайлас жемқорлыққа қарсы іс-қимыл туралы» Заң ережелерін, Қылмыстық кодекстегі және Әкімшілік құқықбұзушылық туралы кодексте белгіленген жауапкершілік түрлерін нақты мысалдармен түсіндірді. Студенттерге сыбайлас жемқорлықтың құқықтық табиғаты, оның алдын алу тетіктері және қоғам өміріне тигізетін жағымсыз салдары жан-жақты баяндалды. Сонымен қатар, сыбайлас жемқорлық құқық бұзушылықтарының түрлері мен оларды жасағаны үшін қолданылатын әкімшілік, тәртіптік және қылмыстық жауапкершілік туралы нақты мәліметтер берілді.

Іс-шарада көрсетілген презентациялық материалдарда 2024 жылғы ресми деректер ұсынылды: 1493 адам сыбайлас жемқорлық фактісі бойынша ұсталып, 486,5 миллиард теңге мемлекетке қайтарылған. Қайтарылған қаражаттың едәуір бөлігі әлеуметтік мақсаттарға – оның ішінде 56 мектептің құрылысына бағытталған. Құқық бұзушылықтардың салдарын азайтуда алдын алу шараларының тиімділігі, құқықтық мониторингтің және ашық бюджеттік жоспарлаудың рөлі де кеңінен талқыланды. Бұл көрсеткіштер Қазақстанның антикоррупциялық саясатының нәтижелілігін айқындайды және мемлекеттік басқару жүйесінде ашықтық пен тиімділікті арттыруға бағытталған институционалдық реформалардың орындалып жатқанын көрсетеді.

Дәріс-кездесу барысында спикерлер жастардың құқықтық сауатын көтерудің маңыздылығын ерекше атап өтіп, құқықтық тәрбие берудің жүйелілігі мен үздіксіздігіне назар аударды. Білім беру ұйымдарында адалдық қағидаттарын қалыптастыру, академиялық адалдықты сақтау және этикалық нормаларды ұстану – қазіргі білім беру жүйесінің маңызды құрамдас бөлігі екені айтылды. Қатысушыларға сыбайлас жемқорлық фактілері туралы хабарлау тәртібі, арнайы call-орталықтардың жұмысы және құқық қорғау органдарына ақпарат беру мүмкіндіктері түсіндірілді. Сонымен қатар, жастар арасында кеңінен танымал болып келе жатқан «Антикоррупциялық волонтерлік», «Бизнеске жол» және басқа да жобалар таныстырылып, олардың құқықтық мәдениетті қалыптастырудағы әлеуеті көрсетілді.

Іс-шара соңында студенттер мен оқытушылар тарапынан қойылған сұрақтарға құқықтық негізде нақты жауаптар берілді. Қатысушылар бұл кездесуді тәжірибелік мәні бар, білім мен құқықтық танымды ұштастыратын маңызды диалог алаңы ретінде қабылдады. Мұндай дәрістердің университеттің ішкі білім беру саясаты аясында тұрақты ұйымдастырылуы – білім алушылардың құқықтық құзыреттілігін жетілдіруге, заңға деген құрметті қалыптастыруға және сыбайлас жемқорлыққа деген төзімсіздікті нығайтуға септігін тигізеді.

Дәріс-кездесудің жоғары деңгейде ұйымдастырылуына «Әлеуметтік-гуманитарлық пәндер және әлем тілдері» кафедрасы мен университеттің Жастар саясаты департаменті ұйытқы болды. Олар құқықтық ағартушылық жұмыстарын жүйелі түрде жүзеге асыруға, білім беру ортасын ашықтық, әділеттілік және жауапкершілік қағидаттары негізінде дамытуға бағытталған стратегиялық міндеттерді іске асыруда маңызды рөл атқарып келеді.