Халықаралық инженерлік-технологиялық университетінде 1–3 курс студенттеріне арналған 2026–2027 оқу жылына арналған академиялық ұтқырлық бағдарламасы бойынша ақпараттық кездесу өтті.

Іс-шараны Халықаралық ынтымақтастық департаменті ұйымдастырды. Кездесуді департамент директоры Шохаева Карлыгаш Нурлановна ашып, шетелде білім алу мүмкіндіктері, бағдарлама шарттары мен оның артықшылықтары туралы толық ақпарат берді.

Презентация барысында студенттерге Ұлыбритания, Қытай, Түркия, Малайзия, Әзірбайжан, Өзбекстан және Қырғызстан елдеріндегі серіктес университеттер туралы мәлімет ұсынылды. Сонымен қатар, академиялық ұтқырлық аясында оқуға болатын білім беру бағдарламалары мен қатысу талаптары (GPA деңгейі, тілдік дайындық, академиялық қарыздың болмауы) кеңінен түсіндірілді.

Кездесудің маңызды бөліктерінің бірі — күзгі семестрде Kastamonu University (Түркия) университетінде білім алып келген студенттердің баяндамасы болды. Олар өз тәжірибелерімен бөлісіп, оқу процесі, тұрмыс жағдайы және шетелде бейімделу ерекшеліктері туралы айтып берді.

Сондай-ақ қатысушыларға қазіргі таңда шетелде білім алып жатқан студенттердің қатысуымен дайындалған бейнеролик көрсетілді. Бұл студенттік өмір мен оқу үдерісін көзбен көруге мүмкіндік берді.

Іс-шараның келесі кезеңінде шетелде оқып жатқан студенттермен онлайн байланыс ұйымдастырылып, қатысушылар тікелей сұрақ қойып, нақты жауаптар алды.

Кездесу соңында университет проректоры Абдилдаева Асель Асылбековна қорытынды сөз сөйлеп, академиялық ұтқырлықтың студенттердің дамуы үшін маңызды мүмкіндік екенін атап өтті. Ол халықаралық білім беру бағдарламаларына қатысу бәсекеге қабілетті мамандарды қалыптастыруға, ой-өрісті кеңейтуге және жаңа кәсіби мүмкіндіктер ашуға ықпал ететінін ерекше атап өтті.

Кездесу интерактивті форматта өтіп, студенттер тарапынан жоғары қызығушылық тудырды. Көптеген қатысушылар бағдарламаға қатысуға ниет білдірді.

Академиялық ұтқырлық бағдарламасына өтінім қабылдау мерзімі — 2026 жылғы 10 маусымға дейін.