2026 жылғы 4 маусымда CareerTours жобасы аясында Халықаралық инженерлік-технологиялық университетінің (METU) басшылығы мен өкілдері «Dolce-Pharm» өндірістік кешеніне барып, кәсіпорын қызметімен танысты және ынтымақтастықты одан әрі дамыту перспективаларын талқылады.

Экскурсия барысында қатысушылар өндірістік үдерістермен, кәсіпорынның технологиялық ерекшеліктерімен, өндірісті ұйымдастыру жүйесімен және компания қызметінің негізгі бағыттарымен танысты. «Dolce-Pharm» өкілдері кәсіпорын құрылымы, кадрлық қажеттіліктері және жас мамандардың кәсіби дамуына арналған мүмкіндіктер туралы ақпарат берді.

Кездесу барысында тараптар METU білім алушыларының өндірістік және кәсіби практикасын ұйымдастыру, тағылымдамадан өту және кейіннен жұмысқа орналасу мүмкіндіктерін, сондай-ақ кәсіпорын базасында практикадан өте алатын білім беру бағдарламаларының бағыттарын талқылады.

Сонымен қатар ғылыми ынтымақтастықты дамыту, бірлескен ғылыми-зерттеу жобаларын іске асыру, университет пен өндіріс арасындағы тәжірибе алмасу, сондай-ақ компания мамандарының университеттің білім беру және тәжірибеге бағытталған бастамаларына қатысу мәселелеріне ерекше назар аударылды.

Кездесу қорытындысы бойынша тараптар серіктестікті кеңейтуге қызығушылықтарын растап, өзара іс-қимылды дамыту бойынша алдағы қадамдарды келісіп алды. Сондай-ақ METU білім алушылары үшін кәсіпорын қызметімен, практикадан өту мүмкіндіктерімен және болашақ жұмысқа орналасу перспективаларымен танысу мақсатында арнайы экскурсия ұйымдастыру туралы келісімге қол жеткізілді.