2026 жылғы 11 қыркүйекте Алматы облысы, Еңбекшіқазақ ауданы, Қаракемер ауылында «Жасыл бақ: ғылым, кәсіптік білім және аграрлық өндіріс интеграциясының заманауи векторы» тақырыбында ғылыми-тәжірибелік іс-шара өтті.

Іс-шараға METU университетінің «Тағам өндірісінің технологиясы және инжинирингі» кафедрасының ПиАП-25-1к және ПиАП-25-1р топтарының білім алушылары қатысты. Студенттермен бірге топ эдвайзерлері әрі кафедраның профессор-оқытушылар құрамының өкілдері Әділханқызы Айнура мен Ибрайхан Ақниет барды.
Іс-шараны Қазақ тағам өнеркәсібі ғылыми-зерттеу институты ұйымдастырды. Кездесу ғылым, кәсіптік білім беру, аграрлық бизнес және шаруа қожалықтары өкілдерінің арасында тәжірибе алмасуға арналған тиімді алаңға айналды.
Ғылыми-тәжірибелік іс-шара барысында бақ шаруашылығында қолданылатын заманауи технологиялар, мамандарды тәжірибеге бағыттап даярлау, ғылыми әзірлемелерді өндіріске енгізу, сондай-ақ ғылыми ұйымдар, білім беру мекемелері және ауыл шаруашылығы кәсіпорындары арасындағы ынтымақтастықты нығайту мәселелері талқыланды.

Іс-шараға қатысу барысында білім алушылар аграрлық өндірістің заманауи бағыттарымен және бақ шаруашылығы саласында қолданылатын озық технологиялармен танысты. Сонымен қатар студенттер теориялық білімдерін тәжірибемен ұштастырып, болашақ мамандықтарына қатысты кәсіби түсініктерін кеңейтуге мүмкіндік алды.

Осындай ғылыми-тәжірибелік кездесулер білім алушылардың кәсіби құзыреттіліктерін қалыптастыруға, тәжірибелік дағдыларын дамытуға және ғылым, білім мен өндіріс арасындағы байланысты нығайтуға ықпал етеді.