Халықаралық инженерлік-технологиялық университетінің (METU) Халықаралық ынтымақтастық департаментінің директоры Қарлығаш Нұрланқызы Шохаева Түркия Республикасының Алматы қаласындағы Бас консулдығының білім беру мәселелері жөніндегі атташесі Шүкүр Мурзамен ресми кездесу өткізді.

Кездесуде Қазақстан мен Түркия арасындағы достық және бауырластық қатынастар аясында жоғары білім беру саласындағы ынтымақтастықты дамыту, университеттер арасындағы академиялық байланыстарды кеңейту және бірлескен білім беру жобаларын іске асыру мәселелері талқыланды.

Тараптар METU мен Түркия университеттері арасындағы академиялық ынтымақтастықты кеңейтуге, сондай-ақ бірлескен мәдени және білім беру іс-шараларын ұйымдастыруға ерекше назар аударды. Мұндай бастамалар университеттер арасындағы өзара іс-қимылды жандандыруға және студенттер мен оқытушылардың мәдениетаралық байланыстарын дамытуға бағытталған.

Кездесудің маңызды тақырыптарының бірі университетте түрік тілін оқытуды дамыту болды. Осы бағытта Түркиядан түрік тілі оқытушыларын шақыру мүмкіндіктері қарастырылды. Бұл бастама студенттердің тілдік құзыреттерін жетілдіруге, түрік мәдениетімен жақынырақ танысуына және халықаралық білім беру бағдарламаларына қатысу мүмкіндіктерін кеңейтуге ықпал ете алады.

Кездесу қорытындысында тараптар білім беру және мәдениет салаларындағы байланыстарды нығайтуға, сондай-ақ өзара ынтымақтастықты одан әрі дамытуға мүдделі екенін білдірді.